एनपिएलका विजेता टिमले पाएनन् पुरस्कार रकम

क्यानका प्रवक्ता छुम्बी लामा भन्छन्, “बोर्ड मिटिङमा कुरा उठायौँ, दुई पटक बैठक पनि बस्यो। केही टिमले पैसा नदिएकाले ढिला भएको हो, तर अबको एक महिनामा सबै भुक्तानी गर्छौँ।” तर कर्णाली याक्सका सह-मालिक गृहेन्द्र घिमिरेले भने, “हामीले सबै पैसा बुझाइसक्यौँ, तर क्यानबाट अहिलेसम्म केही आएको छैन। उहाँहरू काम गरिरहनुभएको होला, तर पैसा चाहिँ आएन।”

त्यति मात्र होइन, क्यानले फ्रेन्चाइज टिमहरूलाई लिगको आम्दानी-खर्चको हिसाब पनि देखाएको छैन। सम्झौताअनुसार विज्ञापन र टिकटको ५०% रकम आठ टिमले पाउनुपर्ने हो। टिम किन्दा पोखरा एभेन्जर्सले ३ करोड ५७ लाखदेखि कर्णाली याक्सले १ करोड ११ लाख ७० हजारसम्म तिरेका थिए। यो पैसा बाँड्नु नपरे पनि अन्य आम्दानीको आधा टिमलाई दिने सहमति थियो। तर क्यानले “कति उठ्यो, कति खर्च भयो?” भन्ने विवरण अझै लुकाएर राखेको छ। एक टिमका सदस्य भन्छन्, “पारस खड्काले अनौपचारिक रूपमा एउटा टिमलाई १ करोडसम्म आउँछ भनेका छन्, तर औपचारिक विवरण केही छैन।”

राष्ट्रिय खेलकुद परिषद् पनि यो मामिलामा उत्रिएको छ। एनपिएलमा गैरकानुनी काम, अपारदर्शी कारोबार र विदेशी कम्पनीसँगको सम्झौताको छानबिन गर्न चैत २० मा अञ्जन धमलाको नेतृत्वमा समिति बन्यो। १५ दिनभित्र प्रतिवेदन दिने जिम्मा छ, तर यो विवादले दोस्रो सिजन नै अन्योलमा परेको छ। काठमाडौँ जिल्ला अदालतले माघ २४ मा क्यानलाई “जोरा स्पोर्ट्ससँगको करारविपरीत काम नगर्न” आदेश दिएको छ। मुद्दा नटुंगिँदासम्म एनपिएलको नाममा अर्को सिजन चलाउन मुस्किल छ।

क्यानले कति कमायो? फ्रेन्चाइज टिम बेचेर १६ करोड ८८ लाख ९३ हजार २३१, ब्रान्ड लजिकलाई कमर्शियल राइट्स बेचेर ५ करोड ९२ लाख, सिद्धार्थ बैँकसँग ३ करोड (दाबीअनुसार) र टिकटबाट ४ करोड उठाएको अनुमान छ। युट्युब, फ्यान कोड र ओटीटीबाट पनि आम्दानी भयो। फाइनल खेल एक्सन स्पोर्ट्समा ३७ लाखले हेरे। खर्च पनि कम छैन – त्रिवि मैदानको संरचना, स्टार स्पोर्ट्सलाई पैसा, टिसिएमलाई ९२ हजार ५ सय डलर (५०% भुक्तानी)। तर दुई बोर्ड मिटिङपछि पनि हिसाब सार्वजनिक भएको छैन। लामालाई सोध्दा भन्छन्, “त्यो कसरी भनौँ, मिल्दैन।”

यो गफ त झन् रमाइलो बन्दैछ – पैसा कता गयो, हिसाब कहाँ छ, अनि दोस्रो सिजन के होला? सबैको आँखा क्यानमाथि छ!

प्रकाशित मिति: २६ चैत्र २०८१, बुधबार १२:०४