डा. जगमान गुरुङको नेतृत्वमा बुधबार काठमाडौंको स्मार्ट दरबार, शङ्खपार्कमा भएको संयुक्त जनआन्दोलन समितिको प्रतिबद्धता सभाले धेरैको ध्यान खिचेको छ। नेपाली कांग्रेस छोडेका कर्ण मल्ल र नेकपा एमाले छोडेकी गंगा चौधरीजस्ता नयाँ अनुहार राजावादी मञ्चमा देखिनुले यो आन्दोलनमा फरक रंग थपिएको छ।
चैत १५ को तीनकुने हिंसापछि नवराज सुवेदी नजरबन्द र दुर्गा प्रसाईं बेपत्ता भएपछि गुरुङलाई संयोजक बनाइएको हो। उक्त सभामा राष्ट्रिय प्रजातन्त्र पार्टी नेपालका अध्यक्ष कमल थापा र एकीकृत राष्ट्रवादी शक्ति निर्माण अभियानका केशरबहादुर विष्ट पनि देखिए, जसले पहिले सहभागी नहुने भने पनि मन बदलेको देखाउँछ। राप्रपाका राजेन्द्र लिङ्देन भने अनुपस्थित रहे।
कर्ण मल्ल, जो शेरबहादुर देउवासँगको विवादपछि कांग्रेसबाट निष्कासित भएर नेपाली कांग्रेस बिपी हुँदै राजावादी कित्तामा पुगे, र गंगा चौधरी, जो एमालेले टिकट नदिएपछि स्वतन्त्र लडेर हारेपछि विद्रोही बनेर यहाँ आइपुगे, दुवैले नयाँ राजावादी पहिचान बनाएका छन्। मञ्चमा उनीहरूलाई स्थान दिनुले आन्दोलनको आधार फराकिलो बनाउने प्रयास देखिन्छ।
जगमान आफैं पनि एमाले, कांग्रेस र माओवादीसँग जोडिएर लाभ लिएका पात्र हुन्। देउवाको पालामा प्रज्ञा प्रतिष्ठानको सदस्य बनेका र ओलीको तारिफमा रमाएका उनी अहिले ज्ञानेन्द्र शाहलाई फर्काउन जुटेका छन्। यो सभाले राजा र हिन्दु राज्यको एजेण्डालाई फेरि बलियोसँग उठाएको छ। तर, तीनकुनेको हिंसाको छायाँ र नेतृत्वको यो मिश्रणले आन्दोलन कता जान्छ, त्यो हेर्न बाँकी छ!
प्रकाशित मिति : २७ चैत्र २०८१, बिहीबार १२:२६
