मुकुल ढकालले रवि लामिछानेलाई भने– मैले पहिला नै भनेको हो धेरै खुुसी नहुनु 

उच्च अदालत तुलसीपुरको बुटवल इजलासले सहकारी ठगी प्रकरणमा रवि लामिछानेलाई पुर्पक्षका लागि थुनामा पठाउने आदेश दिएपछि डा. मुकुल ढकालले सामाजिक सञ्जालमा लामो स्टाटस लेखेर आफ्नो कुरा राखेका छन्। रास्वपाका संस्थापक महामन्त्री रहेका ढकाल, जसलाई पछि निष्कासित गरिएको थियो, रविका पुराना मित्र पनि हुन्। उनले पहिल्यै “धेरै खुसी नहुनु” भनेर सुझाएको स्मरण गर्दै अहिलेको अवस्थामा अदालतको फैसला स्वीकार्नुपर्ने बताएका छन्।

ढकालको भनाइ छ – “धरौटीमा छँदा अदालतको सम्मान गरेका थियौँ, अहिले थुनामा पठाउँदा गाली किन गर्नु? हिजो जसरी स्वागत गरियो, आज पनि त्यसै गर्नुपर्छ।” उनले रविलाई राजनीतिबाट बिदा गरेर रास्वपालाई साँचो अर्थमा “राष्ट्रिय स्वतन्त्र पार्टी” बनाउनुपर्ने प्रस्ताव राखेका छन्। “असार १९ मा मैले यो कुरा भनेको थिएँ, चैतसम्म पनि नबुझिए राजनीति छोडौँ,” भन्दै उनले पार्टी जोगाउन रविकेन्द्रित नभई व्यापक बनाउनुपर्ने जोड दिएका छन्।

उनको स्टाटसमा अदालतको गोलचक्करको कुरा पनि छ – “जिल्लाले धरौटी, उच्चले थुना, सर्वोच्चले छोड्ला, फेरि जिल्ला-उच्चको चक्कर चलिरहन्छ।” अन्त्यमा रविले भनेको “शून्यमा पुर्‍याएँ” भन्ने वाक्यलाई कोट गर्दै ढकालले जवाफ फर्काएका छन् – “म शून्य थिएँ, छु र रहनेछु, तर दाइ तपाईंचाहिँ कति?” यो गफले त रास्वपाको भित्री खिचातानी र ढकालको रविप्रतिको असन्तुष्टि राम्रैसँग देखायो। अब यो कुरा पार्टीभित्र कसरी अगाडि बढ्छ, हेर्न बाँकी छ!